శాంతిపురం, చిత్తూరు ఎక్స్ ప్రెస్, జూలై 20:
చిత్తూరు జిల్లా శాంతిపురం మండలంలోని చిన్నారిదొడ్డి పంచాయతీ పరిధిలో గ్రామ రైతు సేవా కేంద్రంలో పాడి రైతులకు 50 శాతం సబ్సిడీతో పశువుల దాణా పంపిణీ కార్యక్రమాన్ని సోమవారం నిర్వహించారు. పంచాయతీ అధ్యక్షులు శ్రీనివాసులు రెడ్డి ఆధ్వర్యంలో జరిగిన ఈ కార్యక్రమంలో అర్హులైన పాడి రైతులకు సబ్సిడీతో దాణాను అందజేశారు. ఈ సందర్భంగా నిర్వాహకులు మాట్లాడుతూ, రాష్ట్ర ప్రభుత్వం పాడి రైతుల సంక్షేమం, పాల ఉత్పత్తి పెంపు లక్ష్యంగా అమలు చేస్తున్న పథకాలలో భాగంగా ఈ కార్యక్రమాన్ని నిర్వహించినట్లు తెలిపారు. పాడి పరిశ్రమ గ్రామీణ ఆర్థిక వ్యవస్థకు వెన్నెముక వంటిదని, నాణ్యమైన దాణా అందించడం వల్ల పాల దిగుబడి పెరగడంతో పాటు రైతుల ఆదాయం కూడా మెరుగుపడుతుందని పేర్కొన్నారు. ప్రభుత్వం అందిస్తున్న 50 శాతం సబ్సిడీ పథకాన్ని ప్రతి అర్హులైన పాడి రైతు సద్వినియోగం చేసుకోవాలని సూచించారు. పశువైద్యాధికారులు మాట్లాడుతూ, పశువులకు సమతుల్య పోషకాహారం, క్రమం తప్పకుండా టీకాలు, వైద్య పరీక్షలు నిర్వహించడం ద్వారా వాటి ఆరోగ్యం మెరుగుపడి పాల ఉత్పత్తి గణనీయంగా పెరుగుతుందని వివరించారు. శాస్త్రీయ పద్ధతుల్లో పశుపోషణ చేపట్టాలని రైతులకు సూచించారు. కార్యక్రమంలో ఏఎంసీ డైరెక్టర్ హరినాథ్ రెడ్డి, క్లస్టర్ ఇంచార్జ్ నాగరాజు, జయరాం, జయప్పతో పాటు పలువురు నాయకులు, అధికారులు, పాడి రైతులు పాల్గొన్నారు. ప్రభుత్వం అందిస్తున్న సబ్సిడీ పథకం తమకు ఎంతో ఉపయోగకరంగా ఉందని రైతులు హర్షం వ్యక్తం చేస్తూ ప్రభుత్వానికి కృతజ్ఞతలు తెలిపారు.
Recent Comments