సర్పదోష పూజలో ప్రత్యక్షమైన నాగుపాము..  భక్తుల్లో భయాందోళన

📰 Generate e-Paper Clip

రామకుప్పం,చిత్తూరు ఎక్స్ ప్రెస్, జూన్09;

చిత్తూరు జిల్లా కుప్పం నియోజకవర్గం రామకుప్పం మండల పరిధిలోని దేవనేసన సమీపంలోని సుబ్రహ్మణ్యస్వామి ఆలయంలో నిర్వహిస్తున్న సర్పదోష పూజల సందర్భంగా అరుదైన ఘటన చోటుచేసుకుంది. పూజలు జరుగుతున్న సమయంలో ఆలయ ప్రాంగణంలోకి భారీ నాగుపాము రావడంతో భక్తులు ఒక్కసారిగా భయాందోళనకు గురయ్యారు. స్థానికుల వివరాల ప్రకారం, సర్పదోష నివారణ కోసం ఆలయంలో ప్రత్యేక పూజలు నిర్వహిస్తుండగా నాగుపాము ప్రత్యక్షమైంది. పూజలు జరుగుతున్న ప్రాంతానికి సమీపంలో కనిపించిన పామును చూసిన భక్తులు కొంతసేపు ఆందోళనకు గురయ్యారు. అయితే ఆలయ నిర్వాహకులు, గ్రామస్తులు అప్రమత్తమై భక్తులను సురక్షిత ప్రాంతాలకు తరలించారు. అనంతరం పామును ఎలాంటి హాని కలిగించకుండా జాగ్రత్తగా పట్టుకుని సమీప అటవీ ప్రాంతంలో వదిలిపెట్టారు. ఈ ఘటనతో ఆలయానికి వచ్చిన భక్తులు ఆశ్చర్యం వ్యక్తం చేశారు. నాగుపాము ప్రత్యక్షమైన విషయం స్థానికంగా చర్చనీయాంశంగా మారింది. ఘటనలో ఎలాంటి అవాంఛనీయ పరిస్థితులు చోటుచేసుకోకపోవడంతో భక్తులు ఊపిరి పీల్చుకున్నారు. ఆలయ నిర్వాహకులు భక్తులు అప్రమత్తంగా ఉండాలని, అడవి ప్రాంతాలకు సమీపంలో ఉన్న ఆలయాలకు వచ్చే సమయంలో జాగ్రత్తలు పాటించాలని సూచించారు.